ಈ ಕನಸು

ಇದು ವರ್ಷದ ಕನಸು

ನಮ್ಮ ಸಹೋದರ ಸಂಸ್ಥೆ ವಾರ್ತೆ.ಕಾಂ ನಲ್ಲಿ ಇತ್ತೀಚಿನ ಸುದ್ದಿ/ವಿಶೇಷ ವರದಿಗಳನ್ನು ವೀಕ್ಷಿಸಬಹುದು...

ಮನಸ್ಸಿನ ನೋವು...ಒತ್ತಡದ ಜೀವನದಿಂದ ಒಂದಷ್ಟು ರಿಲ್ಯಾಕ್ಸ್ ಬೇಕೇ ಬೇಕೆಂದಾಗ ನಮಗೆ ರಿಲ್ಯಾಕ್ಸ್ ಒದಗಿಸುವುದು "ಸುತ್ತಾಟ".ಬೆಟ್ಟ ಹತ್ತುವುದು, ಊರು ಸುತ್ತುವುದು ಯಾರಿಗೆ ಇಷ್ಟವಿಲ್ಲ ಹೇಳಿ...ಹೀಗೆ ಸುತ್ತಾಟ ನಡೆಸಿದಾಗ ಸಿಗುವ ಆನಂದವೇ ಬೇರೆ... ಸುಮ್ಮನೆ ಒಂದು ಸುತ್ತಾಟ ನಡೆಸಿದಾಗ ಆದಂತಹ ಅನುಭವ ಈ ಕನಸು.ಕಾಂ ಓದುಗರಿಗಾಗಿ...




ಕಳೆದ ಭಾನುವಾರ, ಮೈಸೂರಿನ ಯೂಥ್ ಹಾಸ್ಟೆಲ್ ಅಸೋಸಿಯೇಷನ್ ನವರು, ಸುಮಾರು ೩೦ ಕಿ.ಮಿ. ದೂರದಲ್ಲಿರುವ ಮಹದೇಪುರಕ್ಕೆ ಸೈಕಲ್ ಜಾಥಾ ಏರ್ಪಡಿಸಿದ್ದರು.

ಕಾವೇರಿ ನದಿಯ ತೀರದಲ್ಲಿರುವ ಹಚ್ಚ ಹಸುರಿನ ಮಹಾದೇವಪುರಕ್ಕೆ ಕೆಲವು ವರುಷಗಳ ಹಿಂದೆ ಹೋಗಿದ್ದೆ. ಸುಂದರವಾದ ಈ ಹಳ್ಳಿಯಲ್ಲಿ ಕನ್ನಡ ಚಲನಚಿತ್ರಗಳ ಛಾಯಾಗ್ರಹಣ ನಡೆಯುತ್ತದೆ. ಹಾಗಾಗಿ, ನನಗೆ ಸೈಕಲ್ ಚಲಾಯಿಸುವ ಧೈರ್ಯ ಇಲ್ಲದಿದ್ದರೂ, ಹಳ್ಳಿಗೆ ಹೋಗುವ ಉದ್ದೇಶದಿಂದ ನಾನೂ ಭಾಗವಹಿಸಿದೆ. ನಮ್ಮ ಬಡಾವಣೆಯ ಸಮಾನಾಸಕ್ತರೂ ಜತೆಯಾದರು. ಐದು ಜನರ ನಮ್ಮ ತಂಡ ಕಾರಿನಲ್ಲಿ ಮಹಾದೇವಪುರಕ್ಕೆ ಹೊರಟಿತು. ಉಷಾ ಅವರ ಹುಮ್ಮಸ್ಸಿನ ಕಾರು ಚಾಲನೆ ಯಲ್ಲಿ ರಸ್ತೆ ಮಧ್ಯದ ಗುಂಡಿಗಳನ್ನು ದಾಟುತ್ತಾ ಸುಮಾರು ೧೦ ಕಿ.ಮಿ. ಕ್ರಮಿಸಿರಬಹುದು. ಅಷ್ಟರಲ್ಲಿ ನಮ್ಮಿಂದ ಮೊದಲು ಹೊರಟಿದ್ದ ಸೈಕಲ್ ಜಾಥಾ ತಂಡ ಕಾಣಿಸಿತು.


ಸೈಕಲ್ ಜಾಥಾ ದ ಮುಂಚೂಣಿಯಲ್ಲಿದ್ದ ಸೋಮಶೇಖರ್ ಅವರು ಹಿರಿಯ ನಾಗರಿಕರಂತೆ ಕಾಣಿಸುತ್ತಿದ್ದರೂ, ಸೈಕಲ್ ಸವಾರಿಯಲ್ಲಿ ದಿಗ್ಗಜರು. ಹಲವಾರು ಪ್ರಶಸ್ತಿ- ಪದಕಗಳನ್ನು ತಮ್ಮದಾಗಿಸಿಕೊಂಡಿದ್ದಾರೆ.
ಅಲ್ಲಲ್ಲಿ ತುಸು ವಿಶ್ರಾಂತಿ ಪಡೆದು ಸೈಕಲ್ ಸವಾರರು ಮಹಾದೇವಪುರಕ್ಕೆ ತಲಪುವಾಗ ಸುಮಾರು ೧೧.೩೦ ಗಂಟೆಯಾಗಿತ್ತು.

ಪುಟ್ಟ ತೆಪ್ಪಗಳಲ್ಲಿ ಕುಳಿತು ಕಾವೇರಿ ನದಿಯಲ್ಲಿ ಒಂದು ಸುತ್ತು ಬಂದಾಯಿತು. ತಂಪಾದ ಗಾಳಿಯನ್ನು ಆಸ್ವಾದಿಸುತ್ತಾ, ಫೊಟೊ ಕ್ಲಿಕ್ಕಿಸುತ್ತಾ ಇರುವಷ್ಟರಲ್ಲಿ ಇನ್ನೊಂದು ಕಾರಿನಲ್ಲಿ ಬಂದ ’ಯೂಥ್’ ಬಳಗ ಸವಿಯಾದ ಕಲ್ಲಂಗಡಿ ಹಣ್ಣು ಹಾಗೂ ಊಟದ ವ್ಯವಸ್ಥೆ ಮಾಡಿತು.

ನದಿದಡದಲ್ಲಿ ಕುಳಿತು ಅಥವಾ ನಿಂತುಕೊಂಡು ಪಲಾವ್, ಪಚಡಿ, ಮೊಸರನ್ನ, ಉಪ್ಪಿನಕಾಯಿಯ ಊಟವನ್ನು ಸವಿದೆವು. ಅನಂತರ ಅಲ್ಲಿಯೇ ಸ್ವಲ್ಪ ದೂರದಲ್ಲಿರುವ ಪುಟ್ಟ ಅಣೆಕಟ್ಟಿಗೆ (ರಾಮಸ್ವಾಮಿ ಅಣೆಕಟ್ಟು) ಹೋದೆವು. ಇಲ್ಲಿ ನೀರು ಶುಭ್ರವಾಗಿತ್ತು, ಹಾಗೂ ನೀರಿನಲ್ಲಿ ಈಜಲು- ತೇಲಲು ಬೇಕಾಗುವ ಪರಿಕರಗಳನ್ನು ಯೂಥ್ ಬಳಗ ವ್ಯವಸ್ಥೆ ಮಾಡಿತ್ತು. ಜನ ಜಂಗುಳಿಯೂ ಇದ್ದಿರಲಿಲ್ಲ. ಹಾಗಾಗಿ, ನೀರಿನಲ್ಲಿ ಆಡಲು ಶುರುಹಚ್ಚಿದವರಿಗೆ ಸಮಯದ ಪರಿವೆಯೇ ಇದ್ದಂತಿರಲಿಲ್ಲ.

ಜೀವ ರಕ್ಷಕ ಜಾಕೆಟ್ ಹಾಕಿ ನೀರಿನಲ್ಲಿ ತೇಲಿದವರು ಕೆಲವರು, ರಬ್ಬರ್ ಟಯರ್ ಮೂಲಕ ಈಜಿದವರು ಇನ್ನು ಕೆಲವರು, ನೀರಿನಲ್ಲಿ ಪದ್ಮಾಸನ ಹಾಕಿ ಜಾಣ್ಮೆ ಮೆರೆದವರೊಬ್ಬರು....ಪರಸ್ಪರ ನೀರೆರಚಾಡಿ ಕೀಟಲೆ ಮಾಡುತ್ತಿದ್ದವರು ಕೆಲವರು...ಇವರೆಲ್ಲರ ಸಡಗರವನ್ನು ನೋಡುತ್ತಾ, ನೀರಿಗೆ ಇಳಿಯದೆಯೇ ಸಂತೊಷಿಸುತಿದ್ದ ನಾನು. ಹೀಗಿತ್ತು ನಮ್ಮ ಯೂಥ್ ತಂಡ.

ಸೈಕಲ್ ಜಾಥಾ ಅಂದಾಗ, ನಾನು ಶಾಲಾ-ಕಾಲೇಜಿಗೆ ಹೋಗುವ ವಯಸ್ಸಿನ ಯೂಥ್ ತಂಡವನ್ನು ನಿರೀಕ್ಷಿಸಿದ್ದೆ. ಆದರೆ ಅಲ್ಲಿ ಭಾಗವಹಿಸಿದ್ದ ೧೮ ಮಂದಿಯಲ್ಲಿ ಹುಡುಗರ ಜತೆಗೆ, ನಿವೃತ್ತರೂ ಇದ್ದರು, ಒಬ್ಬ ಮಹಿಳೆಯೂ ಇದ್ದರು. ಎಲ್ಲರೂ ಇಲ್ಲಿ ’ಯೂಥ್’. ವಿರಾಮದ ವೇಳೆಯನ್ನು ಇಷ್ಟೊಂದು ಲವಲವಿಕೆ ಹಾಗೂ ಚಟುವಟಿಕೆಯಿಂದ ಸಂಪನ್ನಗೊಳಿಸುವ ಇವರನ್ನು ನೋಡಿ ಕಲಿಯುವುದು ಸಾಕಷ್ಟಿದೆ ಎನಿಸಿತು.


ಹೇಮಮಾಲಾ,ಮೈಸೂರು.

0 comments:

Post a Comment