ಈ ಕನಸು

ಇದು ವರ್ಷದ ಕನಸು

ನಮ್ಮ ಸಹೋದರ ಸಂಸ್ಥೆ ವಾರ್ತೆ.ಕಾಂ ನಲ್ಲಿ ಇತ್ತೀಚಿನ ಸುದ್ದಿ/ವಿಶೇಷ ವರದಿಗಳನ್ನು ವೀಕ್ಷಿಸಬಹುದು...

ವೈವಿಧ್ಯ
ನಮ್ಮ ಕರ್ನಾಟಕದ ಹುಡುಗಿ ಅರ್ಪಿತಾ.ಇದೀಗ ಲಂಡನ್ ನಲ್ಲಿದ್ದಾರೆ.ಲಂಡನ್ ನಲ್ಲಿದ್ದೇ ಕನ್ನಡದ ಪ್ರೇಮ ತೋರಿದ್ದಾರೆ.ಈ ಕನಸಿಗೆ ನಿರಂತರ ಬರಹಗಳನ್ನು ನೀಡುತ್ತಾ ಬಂದಿರುವ ಅರ್ಪಿತಾ ಇದೀಗ ತಮ್ಮ ಪ್ರವಾಸದ ಹಸಿರು ನೆನಪುಗಳನ್ನು ಓದುಗರಿಗಾಗಿ ಹಂಚುತ್ತಿದ್ದಾರೆ.ನೀವೂ ಓದಿ...ನಿಮ್ಮ ಅಭಿಪ್ರಾಯಗಳನ್ನು ತಿಳಿಸಿ...-ಸಂ.


ಲಂಡನ್ ಗೆ ಬಂದ ಪ್ರಾರಂಭದಲ್ಲಿ ಹತ್ತಿರದಲ್ಲಿರುವ ಎಲ್ಲ ಸ್ಥಳಗಳಿಗೆ ಹೋಗಿ ನೋಡಿ ಬಂದೆವು. ಆಗಸ್ಟ್ ತಿಂಗಳಿನಲ್ಲಿ ಇಲ್ಲಿ ಬೇಸಿಗೆ. ಬೇಸಿಗೆ ಎಂದರೆ ಸುಡುವ ಬಿಸಿಲೇನು ಇರುವುದಿಲ್ಲ. ಸುಮಾರು ೨೦ ಡಿಗ್ರಿ ಅಷ್ಟು ತಾಪಮಾನ ಇತ್ತು.ಆ ಸಮಯದಲ್ಲಿ ಗೆಳೆಯರ ಸಹಾಯದಿಂದ ಹೊಸ ಸ್ಥಳಗಳಿಗೆ ಹೋಗುವ ನಿರ್ಧಾರ ಮಾಡಿದೆವು ಆಗ ಎಲ್ಲರ ಸಲಹೆಯ ಮೇರೆಗೆ ಸಿಕ್ಕ ಸ್ಥಳವೆ ಐಲ್ ಆಫ್ ವೈಟ್ . ಲಂಡನ್ ನಿಂದ ಸುಮಾರು ೧೨೬ ಕಿಲೋಮೀಟರು ದಲ್ಲಿರುವ ಐಲ್ ಆಫ್ ವೈಟ್ ಒಂದು ಸುಂದರ ದ್ವೀಪ .



ನಾವು ಹೋಗಿರುವುದು ೨ ದಿನಗಳ ಪ್ರವಾಸ. ೨ ದಿನಗಳಲ್ಲಿ ಈ ಪುಟ್ಟ ದ್ವೀಪದ ಸುಮಾರು ೬ ಸ್ಥಳಗಳನ್ನು ನೋಡಿ ಬಂದೆವು. ಇಲ್ಲಿಯ ಒಂದೊಂದು ಸ್ಥಳಗಳು ಕೂಡ ಅದ್ಭುತ . ಶನಿವಾರ ಬೆಳಗಿನ ಜಾವ ೫ ಗಂಟೆಗೆ ಮನೆಯಿಂದ ನಾವು ಹೊರಟೆವು. ಮೊದಲು ತಲುಪಿದ ಸ್ಥಳ 'ಪೋರ್ಟ್ಸ್ ಮೌತ್ ಬಂದರು ', ಸುತ್ತಲು ಸಮುದ್ರ ತುಂಬಿರುವ ಇಲ್ಲಿ ಬೆಳಗ್ಗಿನ ಮುಂಜಾನೆ ಆಕರ್ಷಣೀಯವಾಗಿತ್ತು .ಯಥೆಚ್ಚವಾದ ಹಡಗು ಸಂಚಾರ ಸದಾ ಕಾಲ ನಡೆಯುವ ಪ್ರದೇಶವಿದು .ಅದು ನಮ್ಮ ಪ್ರವಾಸ ಪ್ರಾರಂಭದ ಸ್ಥಳ . ಮುಂಜಾನೆಯ ಸೂರ್ಯೋದಯದ ಜೊತೆ ಕಾಫೀ ತಿಂಡಿ ಸವಿದು ಅಲ್ಲಿಂದ ನಮ್ಮ ಪ್ರಯಾಣ ಮೊದಲು ಹೊರಟಿದ್ದು 'ನೀಡಲ್ಸ್ ' ಎಂಬ ಸ್ಥಳಕ್ಕೆ .

ನೀಡಲ್ಸ್ ಹೆಸರೇ ಹೇಳುವಂತೆ ಸೂಜಿಯಾಕಾರದಲ್ಲಿದೆ . ಸುಮಾರು ೫ ಕಿಲೋಮೀಟರ್ ನಷ್ಟು ಹತ್ತಿ ತುದಿ ತಲುಪಬೇಕು ಇಲ್ಲಿ ಮೊದಲು ಶತ್ರುದೇಶಗಳ ಹಡಗುಗಳ ದಾಳಿ ಆಗದಂತೆ ತಡೆಯಲು ಈ ನೀಡಲ್ಸ್ಗ ನ ತುದಿಯಲ್ಲಿ ದೂರದರ್ಷಕಗಳಿಂದ ಕಣ್ಗಾವಲಿಡುತ್ತಿದ್ದರು. ಇದು ಈಗ ಪ್ರವಾಸಿ ಸ್ಥಳವಾಗಿ ಪರಿವರ್ತನೆಯಾಗಿದೆ. ೩ ದಿಕ್ಕಿನಲ್ಲೂ ಸಮುದ್ರವಿದೆ. ಮಧ್ಯೆ ಚಾರಣಕ್ಕೆ ಸ್ಥಳ. ೫ ಕಿಲೋಮೀಟರ್ ನಡೆದರೂ ಒಂದು ಸ್ವಲ್ಪ ಕೂಡ ದಣಿವಾಗದು ಅಂತಹ ಸುಂದರ ವಾತಾವರಣ. ಸುಮಾರು ೩ ಗಂಟೆಗಳ ಕಾಲ ಅಲ್ಲಿಕಳೆದ ನಾವು ನಂತರ ಹೋಗಿದ್ದು 'ಸ್ಯಾನ್ ಡೌನ್ ' ಎಂಬ ಸ್ಥಳಕ್ಕೆ .


ಸ್ಯಾನ್ ಡೌನ್ ನಲ್ಲಿ ಬೀಚ್ ಇದೆ ಸಂಜೆಯ ಸಮಯದಲ್ಲಿ ಬೀಚ್ ನ ವಿಹಾರ ಸುಂದರ. ಸುರ್ಯಾಸ್ತದ ಸಮಯದಲ್ಲಿ ಬೀಚ್ ನಲ್ಲಿ ಕಳೆಯುವ ಆನಂದ ವರ್ಣಿಸಲಸದಳ. ಅಲ್ಲೇ ಒಂದು ಪ್ರಾಣಿ ಸಂಗ್ರಹಾಲಯವು ಇದೆ. ಹುಲಿ ಸಿಂಹ ಹಾವು ಚಿರತೆ ಹೀಗೆ ಹಲವು ಪ್ರಾಣಿಗಳನ್ನು ನೋಡಬಹುದು. ಇದರ ಪಕ್ಕದಲ್ಲೇ ಡಿನೋಸಾರಸ್ ಸಂಗ್ರಹಾಲಯವಿದೆ ಹಿಂದಿನಕಾಲದಲ್ಲಿ ಹೇಗೆ ಡೈನೋಸಾರಸ್ ಗಳು ಬದುಕಿದ್ದವು ಅವುಗಳ ಮೊಟ್ಟೆ ಹೇಗಿರುತ್ತದೆ ಎಂಬುದರ ಬಗ್ಗೆ ಮಾಹಿತಿ ಪಡೆದುಕೊಂಡೆವು .ನಾವು ಉಳಿದುಕೊಳ್ಳುವ ಹೋಟೆಲ್ ಸ್ಯಾನ್ ಡೌನ್ ನಲ್ಲೆ ಇದ್ದುದರಿಂದ ಸುಮಾರು ೭ ಗಂಟೆಯವರೆಗೆ ನಾವು ಬೀಚ್ ನಲ್ಲಿ ಆಟವಾಡಿ ನಂತರ ಹೋಟೆಲ್ ಸೇರಿದೆವು .

ಮರುದಿನ ಮೊದಲೇ ನಿರ್ಧರಿಸಿದಂತೆ ಬೆಳಗ್ಗೆ ೮ ಗಂಟೆಗೆಲ್ಲ ಹೋಟೆಲ್ ನಲ್ಲೆ ಉಪಹಾರ ಮುಗಿಸಿ 'ಗಾಡ್ ಶಿಲ್ ' ಎಂಬ ಸ್ಥಳಕ್ಕೆ ಹೊರಟೆವು .ಗಾಡ್ ಶಿಲ್ ಬಹಳ ಹಳೆಯ ಕಾಲದ ಸ್ಥಳ ಅಲ್ಲಿ ಹಿಂದಿನ ಕಾಲದವರು ಹೇಗಿದ್ದರು ಆಗಿನ ಮನೆಗಳೆಲ್ಲ ಹೇಗಿರುತ್ತದೆ ಎಂಬ ಮಾಹಿತಿ ಸಿಗುತ್ತದೆ .ಸುಮಾರು ೩೦೦ ವರ್ಷಗಳ ಹಿಂದೆ ಇಂಗ್ಲೆಂಡ್ ಹೇಗಿತ್ತು ಎಂಬುದನ್ನು ಇಲ್ಲಿ ನೋಡಬಹುದು .


ಆಗ ನಮ್ಮೂರ ಕಡೆಗಳಲ್ಲಿ ಇರುವ ಸೋಗೆ ಮನೆಗಳು ಇಲ್ಲಿ ಕೂಡ ಇದ್ದವು. ಬಾವಿ ಕೂಡ ಇತ್ತು. ಈಗಲೂ ಅದನ್ನು ಮಾದರಿಯಾಗಿ ಇಡಲಾಗಿದೆ .ನಮ್ಮೂರ ಹಳ್ಳಿಗಳಲ್ಲಿ ಇರುವ ಮನೆಗಳಂತೆ ಕಾಣುತ್ತದೆ. ಜೊತೆಗೆ ಸುತ್ತಲು ಹಸಿರು ತುಂಬಿದ ಅರಣ್ಯ .ಅಲ್ಲಿ ಒಂದು ಮಾದರಿ ಗ್ರಾಮ (ಮಾಡೆಲ್ ವಿಲ್ಲೇಜ್ ) ಎಂಬ ಸಂಗ್ರಹಾಲಯವಿದೆ .ಸುಮಾರು ಒಂದು ತಾಸಿನ ಹಸಿರು ತುಂಬಿದ ಮಾಡೆಲ್ ವಿಲ್ಲೇಜ್ ನ ವೀಕ್ಷಣೆಯ ನಂತರ ನಾವು ಹೋಗಿದ್ದು ಅಲ್ಲಿಯೇ ಹತ್ತಿರದಲ್ಲಿರುವ ಚರ್ಚ್. ಇದು ಕೂಡ ಪುರಾತನವಾದುದು.ಹಿಂದಿನ ಕಾಲದ ಚರ್ಚ ಅನ್ನು ಇನ್ನು ನಡೆಸಿಕೊಂಡು ಬರುತ್ತಿದ್ದಾರೆ .

ಅಲ್ಲಿಂದ ನಮ್ಮ ಪ್ರಯಾಣ ಹೊರಟಿದ್ದು ಶಾಂಕ್ ಲೀನ್ ಎಂಬ ಕಾಡಿಗೆ . ಶಾಂಕ್ ಲೀನ್ ಒಂದು ಪಟ್ಟಣ ಪ್ರದೇಶವೇ ಆದರೆ ಅದರ ಮಧ್ಯದಲ್ಲೇ 'ಶಾಂಕ್ ಲೀನ್ ಶೈನ್ ' ಎಂಬ ದಟ್ಟ ಕಾಡೊಂಡಿದೆ ಇಲ್ಲಿ ಒಂದು ಜಲಪಾತವು ಕೂಡ ಇದೆ. ಜೊತೆಗೆ ಪ್ರಾಣಿ ಪಕ್ಷಿಗಳ ಸಂಗ್ರಹಾಲಯವಿದೆ . ಇದೆಲ್ಲ ನೋಡಿ ಮುಗಿಸಿ ಹೊರ ಹೊರಟರೆ ಸಿಗುವುದೇ ಶಾಂಕ್ ಲೀನ್ ಬೀಚ್ . ಇದರ ಜೊತೆಗೆ ನಮಗೆ ಕುಶಿ ನೀಡಿದ ವಿಷಯವೆಂದರೆ ಇಲ್ಲಿ ನಮಗೆ ನಮ್ಮ ಭಾರತದ ಹೋಟೆಲ್ ಒಂದು ಸಿಕ್ಕಿದ್ದು. ಮಹಾರಾಜ ಎಂಬ ಭಾರತದ ಹೋಟೆಲ್ ನಲ್ಲಿ ದೇಸಿ ಊಟ ಮುಗಿಸಿ ಸಂತೋಷ ಪಟ್ಟು ಅಲ್ಲಿಂದ ನಮ್ಮ ಪ್ರಯಾಣ ಹೊರಟಿದ್ದು ರೈಡ್ ಎಂಬ ಸ್ಥಳಕ್ಕೆ.

ರೈಡ್ ಒಂದು ಸುಂದರ ಸ್ಥಳ ಇದು ಬಂದರುವಿನ ಪಕ್ಕದಲ್ಲೇ ಬರುವುದರಿಂದ ಅಲ್ಲಿ ಸಾಕಷ್ಟು ಹಡಗುಗಳು, ೩ ದಿಕ್ಕುಗಳಲ್ಲೂ ಸಮುದ್ರ . ಇದು ನಮ್ಮ ಕೊನೆಯ ಸ್ಥಳವಾಗಿತ್ತು ನಾವು ಅಲ್ಲಿಂದ ಹೊರಡುವಾಗ ಸುಮಾರು ಸಂಜೆ ೬ ಗಂಟೆ ಯಾಗಿತ್ತು . ೪ ತಾಸಿನ ಪ್ರಯಾಣ ಮತ್ತೆ ಬಂದು ಲಂಡನ್ ತಲುಪುವಾಗ ೧೦ ಗಂಟೆ .ಒಟ್ಟಾರೆಯಾಗಿ ೨ ದಿನ ಸುಂದರ ಹಸಿರು ತುಂಬಿದ ಎಲ್ಲಿ ನೋಡಿದರು ಮತ್ತೆ ಮತ್ತೆ ನೋಡಬೇಕೆಂಬ ಬಿಟ್ಟ ಕಣ್ಣು ಮುಚ್ಚದಂತೆ ಎವೆಯಿಕ್ಕದೆ ನೋಡಿ ಸಂತೋಷ ನೀಡಿದ ಪ್ರವಾಸವದು .ನಿಮ್ಮೊಂದಿಗೆ ಹಂಚಿಕೊಂಡಿದ್ದೇನೆ .


ಅರ್ಪಿತಾ ಹರ್ಷ
ಲಂಡನ್

0 comments:

Post a Comment